Dr. Hefin David AS, Aelod o’r Senedd dros Gaerffili, yn herio’r Prif Weinidog ynghylch gweledigaeth Llywodraeth Cymru ar gyfer hyfforddiant gwaith a chyflogaeth â chymorth

Fe wnaeth Dr. Hefin David AS, Aelod o’r Senedd dros Gaerffili, herio’r Prif Weinidog yn y Senedd ddydd Mawrth ynghylch gweledigaeth Llywodraeth Cymru ar gyfer hyfforddiant gwaith a chyflogaeth â chymorth. Daw ei gwestiwn ar adeg dyngedfennol, wrth i Engage to Change—prosiect arloesol sy’n cefnogi pobl ifanc ag anableddau dysgu, anawsterau dysgu, a/neu awtistiaeth—ddod i ben ar ddiwedd y mis hwn.

Ers ei sefydlu yn 2016, mae Engage to Change wedi chwarae rhan allweddol wrth helpu unigolion 16-25 oed ledled Cymru i gyrraedd eu potensial cyflogaeth. Mae’r fenter, sy’n bartneriaeth rhwng Anabledd Dysgu Cymru ac ymchwilwyr o’r Ganolfan Genedlaethol ar gyfer Iechyd Meddwl ym Mhrifysgol Caerdydd, wedi bod yn hanfodol wrth ddarparu cyfleoedd cyflogaeth â chymorth, gan gynnwys hyfforddiant gwaith a phrentisiaethau. Dros y blynyddoedd, mae’r rhaglen wedi gweithio gyda mwy na 1,300 o bobl ifanc a thua 800 o gyflogwyr, gan ddangos y galw sylweddol am gefnogaeth cyflogaeth arbenigol.

Un o lwyddiannau mwyaf nodedig Engage to Change yw ei gyfradd llwyddiant ryfeddol o 41% wrth sicrhau cyflogaeth i gyfranogwyr—sy’n uwch o lawer na chyfartaledd y DU o 4.8%. Mae’r canlyniadau hyn, a gydnabuwyd gan y Prif Weinidog Eluned Morgan fel rhai “syfrdanol,” yn tynnu sylw at yr effaith sylweddol y mae hyfforddiant gwaith pwrpasol a chefnogaeth cyflogaeth strwythuredig yn ei chael.

Mewn ymateb i gwestiwn Dr. David, cadarnhaodd y Prif Weinidog y bydd gwasanaethau hyfforddi gwaith arbenigol yn cael eu hymgorffori yn Rhaglen Cymorth Cyflogaeth newydd Llywodraeth Cymru o 2027 ymlaen. Pwysleisiodd y bydd llwyddiant Engage to Change yn sylfaen i lunio polisïau a dulliau cyflogaeth yn y dyfodol yng Nghymru.

Wrth ymateb i’r ymrwymiad hwn, mynegodd Dr. Hefin David ei frwdfrydedd, gan ddweud: “Rwyf wedi gweithio ar hyn gydag Engage to Change ers peth amser bellach. Rwyf wedi gweld yr effaith uniongyrchol y mae hyn wedi’i chael, ac rwy’n falch tu hwnt y bydd eu gwaith caled yn parhau i adael ei ôl ar bolisi cyflogaeth yn y dyfodol. Am ffordd wych o orffen prosiect mor arbennig ac o sicrhau etifeddiaeth deilwng yng Nghymru.”

Mae’r cyhoeddiad wedi cael cefnogaeth eang, yn enwedig gan y rhai sydd wedi elwa o’r fenter a’r nifer o sefydliadau sydd wedi partneru ag Engage to Change. Mae llwyddiant y prosiect wrth eirioli dros Strategaeth Hyfforddi Gwaith Genedlaethol yn tanlinellu’r angen am fuddsoddiad parhaus mewn cefnogaeth cyflogaeth i unigolion ag anableddau dysgu ac awtistiaeth.

Gyda’r ymrwymiad gan Lywodraeth Cymru i ymgorffori gwasanaethau hyfforddi gwaith arbenigol yn eu polisïau cyflogaeth yn y dyfodol, bydd etifeddiaeth Engage to Change yn parhau i fyw, gan sicrhau bod pobl ifanc ledled Cymru yn parhau i dderbyn y gefnogaeth sydd ei hangen arnynt i lwyddo yn y farchnad swyddi.

Gallwch wylio datganiad y Prif Weinidog, Eluned Morgan AS, yma: https://youtu.be/viotlQTySWw?si=rTjkx6UXX-JbybhO